01.08.2016
Демократски сојуз: Виница како Италија
Деновиве во градовите од Источна Македонија (Виница, Кочани, Берово, Пехчево, Делчево и др.), пристигнаа "вработените од Владата на Република Македонија" во Италија.
Раководството на ВМРО-ДПМНЕ јавно ги преставува огромните резултати преку намалување на бројот на невработени и тоа за над 50% во Кочани, Виница, Пробиштип итн., но не кажуваат колку се иселени и колку од тие се вработени во Италија и другите држави.
Според нецелосните информации во последните пет години само од Виница се иселени над 8000 граѓани од кои повеќето се вработени во Италија.
Состојбите со вработувањето и иселувањето се катастрофални и ако продолжи овој тренд на празнење на државата, бројот на невработени ќе се сведе на 2% до 3%.
Би било коректно да се информира јавноста колку се иселени од Македонија во последните 10 години и причините за тоа (социјални, политички и др.), како и за стратегијата на власта младите да останат во Македонија.
Во услови додека опозицијата, невладиниот сектор и медиумите, расправат за избирачкиот список, изборната кампања на ВМРО-ДПМНЕ, со медиумска поддршка, добива на интензитет, со силни ветувања за колекторски системи, нови спортски сали, училишта, вработувања и сл.
ДС сугерира владејачките партии заедно со провладините медиуми да прошетаат на Исток за да видат колку "гости" ни дошле од Италија.