27.03.2019

Демократски сојуз: Бојкотот на изборите антидржавен чин

Во пресрет на претседателските избори и најавата за определување на датум за започнување на пристапните преговори за влез во Европската Унија, се наметнуваат неколку приоритети за кои е неопходен политички консензус:

1. Создавање на услови за одржување фер, демократски и чисти претседателски избори, како гаранција за успешност на изборите.

Во оваа насока мора партиите и коалициите кои стојат зад претседателските кандидати да преземат одговорност дека ќе опстојат во изборниот процес, во спротивно, треба да понесат политичка и друг вид на одговорност. 
Бојкот на изборите во вториот изборен круг ќе значи антидржавен чин со катастрофални последици за иднината на државата.

2. Работата на Специјалното јавно обвинителство треба да продолжи со целосен капацитет, а прислушуваните разговори и натаму треба да бидат доказ во постапките, во спротивно, Врховниот суд, со право ќе ги изземе од доказите и во предметите во кои досега се користени.

3. Концептот за реформи во тајните служби треба да се заокружи со коренити организациски и кадровски промени во разузнавачките и контраразузнавачките служби.

4. Мора да се изгради систем за целосна департизација на државните институции, почнувајќи од приемот на работа во администрацијата.

Партизацијата разорно делува врз ефикасноста на државните институции и владеењето на правото.Само со цврсти и јасни критериуми за прием на работа, најкреативните кадри ќе останат да работат во Македонија.Партиските и другите влијанија мора да се санкционираат.Инаку, треба да престанат партиските договарања преку селективна правда, амнестии и други лукративни цели, а наводно во интерес на повисоки цели.