Влез во НАТО и во ЕУ

На последниот конгрес, како и на трите претходни, беше нагласено дека за Демократскиот сојуз, беа и останаа врвмо приоритети: влезот во НАТО и Европската Унија.

Овие стратешки цели не се само наши. Тие ја имаат силната и недвосмислена поддршка на најголемиот број граѓани и политички партии. Се разбира, воочлив е отворениот или прикриен отпор на одделни структури, со монополски и доминантни позиции во различни сектори на општествениот живот, вклучувајќи ги и бизнисот и медиумите, а особено на оние со коруптивно и криминално однесување, на кои не им одговараат високите европски стандарди на законско транспарентно и одговорно работење.

Европските стандарди во македонската одбрана се condition sine qua non за влез во НАТО. Република Македонија беше и остана посветена на реформите. Се работи за процес на континуирано следење на реформските зафати во НАТО, како гаранција дека по разрешувањето на спорот со Грција, подготвени и компатибилни ќе влеземе во него.

Република Македонија треба да продолжи со активната партиципација в о меѓународните мировни мисии, докажувајќо се како de facto член на НАТО и да ја прошири и продлабочи соработката со стратешките партнери, пред се со САД, ЕУ и со НАТО.

Убедени сме и веруваме дека приемот на Република Македонија во НАТО ќе ги зголеми нашите шанси за побрзо интегрирање во ЕУ, односно започнување и завршување на пристаните преговори за влез во ЕУ.

Да потсетиме дека претпристапниот дијалог, кој што беше инициран од Демократскиот сојуз во Собранието на Република Македонија и другите е реална основа за неформално отворање на поглавијата за евро интеграцијата на Република Македонија.

Демократскиот сојуз смета дека деблокирањето на евро-интеграциските процеси, бара од сите партии да превземат дел од одговорноста за надминување на спорот со Грција за нашето име - Република Македонија!

Превземајќи дел од одговорноста, Демократскиот сојуз предлага фазно (етапно) решавање на истиот. Платформата за решавање на спорот со името, подготвена од Демократскиот сојуз, предлагаме да биде основа врз која ќе се (из)гради државен консензус, односно „ сојуз на сите политички сили“ во државата, со што ќе се надминат непроценливите негативни импликации за севкупниот развој на Република Македонија, за добрососедските односи, како и за стабилноста на Балканот во целина.