18.11.2015
Трајанов оствари средба со две здруженија
Денес (18.11.2015) година, Павле Трајанов, претседател на Демократски сојуз и пратеник, прими претставници од здружението на граѓани „Опстанок на Порече“, кои го актуелизираа проблемот со доизградба на патниот правец Скопје – Македонски Брод. Се работи за 12 километри пат од с. Близанско до Белички мост, кој е пробиен, но не е асфалтиран.
Трајанов смета дека оваа делница треба да се асфалтира што е можно побрзо, бидејќи тоа е најкус пат до Македонски Брод и основа за економски развој на овој регион, како и за задржување на населението во градот и другите населени места од регионот. Овој проблем ќе го актуелизира во Парламентот, а ќе бара изградбата на патниот правец да биде внесен и во Програмата за изградба на регионални патишта.
По завршување на средбата, Трајанов прими и претставници од здружението на граѓани „НО ПАСАРАН“ кои протестираат против „БЕГ“, фирма која им доставува сметки за греење, кое не го користат бидејќи не сакаат.
Во разговорот Трајанов посочи дека се работи за апсурд „да плаќаат за услуга (греење) која не ја користат“ и овој проблем заслужува да биде предмет на разгледување од Парламентот и преку измена на законите да се создадат основи граѓаните кои не сакаат да го користат греењето од „БЕГ“ да не мораат да плаќаат.