10.05.2022

Трајанов: Не го повлекуваме предлогот за една изборна единица, Тупанчевски нека си тера нов Изборен законик

Министерот за правда Никола Тупанечевски нека си го тера проектот за нов Изборен законик, ние нема да го повлечеме нашиот предлог закон за измени на Законикот во делот на една изборна единица, пропорционален модел и избор на пратеници според Донтовата формула, вели за „Слободен печат“ Павле Трајанов, пратеник и еден од предлагачите за промена на изборниот модел.-Деновиве, според информации од денешната координација кај претседателот на Собранието, усогласено било со координаторите на пратеничките групи Џафери да го стави на седница нашиот предлог закон.

Немаме намера да го повлечеме нашиот предлог закон за кој речиси е постигнат консензус. Министерството за правда нека си формира работна група и нека ја тераат работата, бидејќи се потребни коренити измени на Изборниот законик. Но тоа може да трае со години.

Министерот за правда може да даде логистика, но партиите градат консензус за Изборниот законик. Најавата за нов Изборен законик од Министерството за правда е обид да го амортизира притисокот од партиите за промена на изборниот модел. Очекувам Џафери деновиве да го стави на пленарна седница нашиот предлог за кој според информациите, е усогласено тој да ја помине првата фаза. Потоа ќе се отвори јавна дискусија, а во второто читање можни се амандмани, по што ќе се гласа и ќе видиме дали ќе помине – вели Трајанов.