19.03.2014
14 ГОДИНИ ДЕМОКРАТСКИ СОЈУЗ
На иницијатива на Павле Трајанов, Никола Младенов, Димитар Гелев, Зоран Петров, Георги Димитров, Братислав Димитров, Верица Андреевска, Томислав Геневски, Теофил Блажевски, Велин Јованов и Владимир Шоптрајанов, на денешен ден, пред точно 14 години во преполнетата сала на новиот објект на Македонскиот народен театар (денешна “Македонската опера и балет“) во Скопје, се одржа Основачкото собрание на Демократскиот сојуз, со што на македонската политичка сцена се појави нов субјект
Тогаш се поставени основните принципи на дејствувањето на партијата, искажани во зборовите на лидерот на ДС, Павле Трајанов:
“Демократскиот сојуз ќе биде непробојна брана за авантуризмот на партиските војници кои си замислуваат дека се генерали на армијата на насилието, па од Македонија сакаат да направат држава без систем на вредности и критериуми кои ги познава и признава цивилизираниот свет. Суверенитетот и територијалниот интегритет на Република Македонија се света работа. Оној кој мисли да прави компромиси, отстапки, да тера личен профит за сметка на туѓи интереси и влијанија, тој, и кај нас, како и во сите држави кои држат до својот углед, ќе биде означен како национален предавник. Тоа е предавство кое во нас, во Демократскиот сојуз, ќе има жесток, нескршлив непријател“, изјави Павле Трајанов на Основачкото Собрание на Демократскиот сојуз.
Денес, Демократскиот сојуз е самостојна политичка партија со автентични политички ставови и како дел од власта е подготвена да преземе дел од одговорноста за вкупните состојби. Демократскиот сојуз не бега ниту од обврските, ниту пак, се колеба со свои идеи, предлози, проекти, да влијае во носењето на клучните одлуки битни за иднината на Република Македонија.
Демократскиот сојуз е демократска политичка партија и отворена за нови идеи и кадри.
Вклучувањето во ДС на над 28 илјади членови, ја потврдува посебноста, препознатливоста и истрајноста на основните политички определби: „Македонија да биде дел од Европската унија и НАТО и респектиран субјект на меѓународната сцена“.