08.08.2018

Павле Трајанов за Слободен печат: Рано е да се прават анкети за референдумот

 Сè уште е рано да се прават анкети во врска со референдумот, иако,  бројките од анкетите имаат големо влијание во целиот процес.

– Анкетата за референдумот што ја спроведе МЦМС покажува дека процентот на гласовите кај Македонците сè уште е многу низок. Затоа сметам дека ќе биде потребна една отворена кампања за Договорот со Грција и на тој начин на граѓаните да им се објаснат перспективите што во иднина ќе ѝ се отворат на Македонија доколку таа влезе во НАТО и во ЕУ.

Објективно, треба да им се пристапи на граѓаните за тие подоцна сами да одлучат дали ќе излезат на референдум, дали ќе гласаат „за“, „против“ или воопшто нема да гласаат.

Анкетите во овој момент повеќе се базираат на проценки отколку на реални бројки и затоа мислам дека е многу рано за да се спроведуваат такви испитувања.

Секако дека овие бројки имаат свое влијание во целиот процес, но најпрво треба Владата заедно со политичките партии, со невладиниот сектор и со медиумите да започне кампања за информирање на народот, па дури подоцна да се вршат анкети и да се анализираат резултатите.

Извор: Слободен печат