10.07.2014

ДС ги повикува граѓаните да не учествуваат во протести организирани по етничка и верска основа

Демократскиот сојуз смета дека демократско право е на секој граѓанин да протестира и да го искаже своето незадоволство, ставови, идеи или барања. Меѓутоа, протестите кои се организирани по етничка и верска основа во врска со судскиот процес што се води против обвинетите за грозоморното убиство на петтемина млади луѓе (на 12 април 2012 година, во близина на Смилковското езеро), е притисок врз судскиот систем и своевидна провокација на етничка и верска основа, поготово што на овие протести се манифестира насилство, се разгорува меѓуетничката нетолеранција и верска омраза.

Овие протести, радикални групи и поединци ги користат за насилство и напади на припадниците на силите за безбедност, државните институции и на истите се промовира верска и етничка нетолеранција и раздор.

Поради тоа, Демократскиот сојуз ги повикува сите граѓани да не учествуваат на ваков вид на протести.

Воедно Демократскиот сојуз  ги осудува обидите на политичките елити да вршат притисок врз судот, при одлучувањето во врска со судскиот процес „Монструм“.

ДС инсистира на целосна транспарентност на судскиот процес и одлуката каква и да е, мора да биде поткрепена со цврсти и релевантни материјални  докази и факти.